最近，為左方便練鼓，平平地買左套二手練習鼓，擺晌屋企練。
由於套鼓係平平地台灣貨，同埋上手仁兄都買左一段時間，雖然鼓皮好新，但隻鼓都幾多塵下。同埋電鍍位都有少少生鏽︰
咁係因為上手只係用濕布抹，就更加快生鏽。我決定搞搞佢……
(閱讀全文)
除左游水之外，之前一排練緊打韓國鼓，覺得打鼓真係好開心。即使只係自己一個係度練練下，但全心全意、集中精神的感覺實在不錯！
由於自已完全無音樂底，好多時基本樂理都一竅不通，又唔識睇鼓譜，練習果時好多野都唔係好明。
為左明多 d 同鼓有關o既樂理，於是又膽粗粗，走去報流行鼓班。學落先知，原來洋鬼子鼓，係複雜好多o既，左手郁一下、右手郁兩下、左腳踩實、右腳踩一下、又有時要踩兩下……總之手腳完全唔協調，痴晒根咁。
現在仍然覺得ok好玩，暫時未有放棄o既打算，所以呢，除左游水同玩車車之外，我又多左一個嗜好o勒~~~
今日返左學校個泳池游水。
呢個係大學畢業生的福利之一，可以晌一個50米奧運標準池游。
游到就黎收池，全個池得我同另一位外藉人士，而且呢，又只得我一個在苦戰中（做緊耐力訓練，每50米中間休息20-30秒）游到氣羅氣喘……
突然，遠處傳來一句英文︰Good swimmer！Very good form! (即係話個姿勢好靚....咁我都同意，因為無實際吖嘛~~~)
我以為咩事，原來距離我8條泳道的鬼佬向我大叫……真係嚇親.....不過原來佢覺得我游得好好，忍唔住讚下姐....真係有心，隔左8條「街」都嗌過黎！哈哈哈！ 跟住開心左半日。
雖然話自由式已經練成，不過近呢兩個月，由於去左大池游，50米標準池，真不是「流」的，游到索晒氣，要特登放慢節奏游先夠氣游完50米。
頭先去左另一個25米室內池游返，弊！由於一直游50米都太hea，而家游25米速度竟然慢左，1分10秒先游完一個來回(即是50米），真係弊。後尾集中精神練返幾百米，先游得返1分7秒，但距離兩個月前在師父迫逼之下的57秒，仲有一大段距離。下次見到師父點交待呢……
蝶式又係，由於太hea關係，扶板打腿竟然連25米都做唔晒，要停低透氣，咁點會有進步呀！
好驚呀！ 仲有轉turn未練過呀！點算？
有趣的泳客
一‧晨運客
相信大家如果早出門口返工返學的話，都會見過晨運客做諸如太極、羽扇舞、健身操等運動/動作。
同樣，泳池也有晨運客。
出沒時間︰早上七時至八時；
出沒地點︰訓練池。
其他時間也有少量，但分散在主池各區。
特徵︰唔游水，但在水中做出各種趣怪動作，例如彈跳、拍水、打跟斗、步行、向後步行、把腳「掛」在池邊拉筯、扮踩單車腳。通常三五成群，習慣完事後吹水直至水很凍，然後結伴上水，往茶樓飲茶。由於經常吹水多過游，加上愛吃茶樓點心，又由於年紀大，新陳代謝減慢，所以一直無法減肥，對於自己的大肚腩一直耿耿於懷，但又不會作出處理。
