話說上星期洗左成日車，都未搞掂，架車仍然係一撻撻樹汁漬。

今次星期一因為請假等件速遞送上門，反正無咩做，又拎架車出黎洗下。

因為隔左成個星期，車身已經有一層塵，咁呢，又要由洗泡泡浴開始做起……

1. 打兩桶水，逐少逐少淋上車身，沖走大粒o既塵先……

2. 打半桶水，加洗車梘液，用洗車海棉打起 d 泡，將舊海棉「索」一大啖水，「撻」上車頂，先洗車頂，然後洗尾冚同尾冚兩側，跟住洗頭冚同頭冚兩側，最後洗四隻車門。淨返少少梘水洗呔鈴。

3.  由於天氣好曬又好好風，梘液好快晌架車度乾鬼左，嗱嗱聲打多兩桶清水，幫架車過水。（可惜呢度無水喉……）

4. 好快咁用大毛巾抹乾車車。（己經用左一個鐘）將架車駛返入蔭頂位（之前因為陰頂位去唔到水，惟有泊出面有坑渠地方洗車）

5. 用去漬泥膠加水，重點針對頑固污漬清理，一邊清一邊用毛巾抹返乾架車。重災區係車頂同車頭冚右側及前轆（又搞左成9個字）

6. 最後仲有d超頑固污漬，就出動打磨粗蠟嘞！呢隻係賣汽車用品舖頭介紹o既，個店員都未聽完我講，淨係聽到「鏽漬」兩個字，就「塞」左呢罐野埋黎，叫我用呢隻野起左d漬，再打軟蠟（即係平時打蠟果隻）就得喎。25蚊，是但啦~~~

架車入左陰頂位9個字，已經攤凍晒，可以用車蠟嘞。用落又真係好好喎，d漬輕輕一捽就無晒，架車又好似無咩點刮花到喎。 （又搞左9個字）

7. d 漬起得七七八八，但係個人連續兩個幾鐘，摛高又趴底，已經超攰，仲未食早餐添，於是上樓take 個 break，飲返罐可樂，仲帶多樽水落停車場……因為仲有打軟蠟呢個步驟未做！！

8. 以為舊果罐仲有車蠟，點知一打開，閃閃令！頂！連罐底都刮到乾淨晒~~~好心用晒就掉左佢啦！！好彩我上次經過旺角買洗車水果陣，一早買定罐新蠟，唔係下個星期又要由頭再搞過！

9. 閃電手15分鐘搞掂上蠟，跟手抹下前後擋風玻璃裡面同外面，因為無買到玻璃水，惟有用報紙加水省住先，都起左少少水印，叫做清返d。

10. 跟手推蠟，呢下真係九九九千足純金，全車都要用力推勻，我其實推完車頂，已經無乜力，所以後期速度明顯減慢，有時仲要返多一兩手先推得乾淨。搞左無9個字都有8個字。

11. 跟住（係，仲有跟住），用雞毛掃掃走跌落玻璃同膠邊位的蠟碎/蠟粉，用濕布抹走痴左晌膠邊同電鍍位的蠟。

12. 打開引擎倉，用濕布抺下d塵同埋前冚的虛位。

13. 執好所有抺車用品及毛巾，分類包好或抺乾。

14. 將架車駛返入車位。成身臭汗同蚊賴，欣賞自己3個半鐘o既辛勞成果，好在自己平時做好體能鍛練，唔係都無體能做咁多野！

15. 沖涼，順便洗埋d抹車布，搵飯食。

 睇下，同一個位，乾淨晒！仲立立令！