最近，為左方便練鼓，平平地買左套二手練習鼓，擺晌屋企練。

由於套鼓係平平地台灣貨，同埋上手仁兄都買左一段時間，雖然鼓皮好新，但隻鼓都幾多塵下。同埋電鍍位都有少少生鏽︰

咁係因為上手只係用濕布抹，就更加快生鏽。我決定搞搞佢……

首先，千祈唔好用濕布抹，因為呢套平鼓，你都唔駛旨意佢 d 電鍍位會做得好靚，係超易氧化o既……

去汽車精品店，買支專抹車身電鍍o既清潔劑，聞落陣味似係白電油加少少砂粉，當然微粒係幼好多啦，盛惠70蚊。其實好多汽車護理牌子都有出呢種清潔劑，你唔一定要買呢隻牌子o既，佢叫Mothers (老母牌？！)，其他牌子都得，基本上成份一樣。

為安全計，我先晌最唔顯眼地方試少少先，睇下會唔會勁得滯，「乸」到甩晒 d 電鍍，或者乸甩隻鼓其他配件。（建議大家記得一定一定要咁做）

經試驗後，係無問題o既，咁就可以開始工程o勒……o拿我示範比大家睇︰

 1. 先倒一滴清潔劑晌電鍍位上面（小心唔好比佢流入 d 抹唔到o既地方），用棉花捧搽勻。

2. 即刻用軟棉布（舊t-恤剪碎好似幾好用）狂捽，捽到d生鏽位唔見晒為止，唔得再倒多少少清潔劑，再捽，總之捽到光滑為止。

3. 然後，再用另一塊乾淨軟棉布，將餘下的白色粉末，抹走。

4. 便會看到閃閃拎的金屬光澤，成功。

記住一定要將餘下的清潔劑清理乾淨，之後就唔好再用濕布抹了。抹一隻鼓連埋支腳架，大約要一粒鐘到。

但Cymbal同腳踏都唔係電鍍，所以千祈唔好用呢隻野抺。

有些生鏽太嚴重，最多都只係可以抹到表面平滑，望落去仲會見到一粒粒啡色，即是入面的鐵都已經露了出來，咁就無法子了。

如果你隻鼓無乜點生鏽，只係有少少啞色，咁就唔駛大力捽了，將清潔劑倒在軟棉布上輕抹，可以有保護成份的，總之記得用另一塊軟布，將白色粉抹走晒就得。

貼多幾張「之前」、「之後」比大家睇。

鼓圈都拆埋出黎「省」。抹鼓圈果陣，記得唔好太用力「襟」個圈，否則個圈彎左，就大劑。

支腳架個較位，中間圓形鏍絲生鏽太嚴重，無得救。